Бусдыг хайрлана гэдэг зориг. Бусдаар хайрлуулна гэдэг ер бусын бэлэг мэт ховорхон зүйл. Аав ээж, ах эгч, үеийн хосууд дундаасаа шударга зөв хайрын харилцааг хараагүй бидэн шиг Монголчуудад хүн нэг л алдсан бол насан туршдаа зовох тавилантай мэт, дахин гэрлэж аз жаргалтай амьдарч болно гэсэн итгэлээ ихэвчлэн алдсан байдаг. Би амьдралдаа алдаж үзсэн. Эр хүнээр хайрлуулах гэж хамаг бүхнээ итгэж зориулаад өөрийн хүсэл мөрөөдөл зорилго бүхнээ алдсан нэгэн. Эр хүн гэж ямар муухай хүн байдгийг хараад жихүүцэж гомдох сэтгэл маань намайг аз жаргалд итгэх зориггүй нэгэн болгож хувиргасан гэдгийг ч мэдээгүй байж билээ. Харин Жилиантай уулзсан тэр мөчүүдэд би өөрийнхөө болон хайртай хүнийхээ сэтгэлийн шархыг мэдрэх хараа орж эхэлсэн л гэлтэй. Нөхөр хоёр Жилиантай ярилцсаны дараа туршилтын тестийн дасгалуудыг, харилцан ойлголцлыг зоригтой хийх ухаантай харилцаанд шилжин орж билээ. Энэ цагаас хойш гэр бүлийн аз жаргал гэж бүтэн утгаараа дахин хайрлаж, хайрлуулах утгыг хүлээн авах эрхээ олж авсан түүхтэй. Одоо би зөвхөн өөрийн амийг бодоод өнгөрөх нь буруу гэж үзээд олон олон Монголчуудынхаа асуудлыг Жилиан Андэйлийн хамтаар шийдэхээр шулуудсан билээ.

        Жилиан бид хоёр хамтдаа 2017 оноос хамтран ажилласнаас хойш маш амжилттайгаар олон зуун Монгол хосуудад хайрлуулж амьдрах хоёр дахь боломжийг олгож чадсан. Үүнийг би гайхамшиг гэж л нэрлэнэ. Энэ удаад Жилиан бид 2 танд өгөхийг хүссэн бас нэгэн чухал гарын авлагыг хүргэж байгаадаа баяртай байна. Энэ номын ачаар таны гэр бүлийн амьдрал газар тэнгэр шиг ялгаатай, алга хөрвүүлэхийн зөрүүгээр өөрчлөх увдис бий шүү. Уншихдаа утга учир өгч сэтгэл зүрхээ зориулж унших тусам ид шид нь танд шингэнэ. Зүгээр л хоосон бодолтойгоор хийсвэр үзлээр бүү уншаарай. Та жаргах эрхтэй хүн.